Fratsen Park De Stroet


NEEDE – Onlangs tuffen ik met onze bezorgbusse hendig deur de Beltrumse stroaten. Neet vulle volk in de beene en ik mos denken an de familie Dute en Spilman beide gingen stoppen met hun bedrieve . Ik zag in gedacht`n Johan nog een biertje tappen van de hutte en André `n halven liter brengen an `t schap. Vervloagen tieden die ieder darp kent. Vanoet een ooghook zag ik toen ik veurbie Spilman kwam iets stoan met mien naam derop. Ik dach zag ik dat noe good doar bie `t hertenkamp?? Ik met de busse of e slaag`n de Haarstroate in veur nog een rondje langs de karke. Bie het hertenkamp heel ik stille en joa `t ston der echt, der kwam een park met onze naam derop: Park De Stroet. Fantatastisch dach ik een eigen park in mien geboortedarp hoe mooi kan `t leaven wean.

Zelfs Jan en Dinie Bouwmeister sprokken mien der oaver an, ze gingen noar een anleunwoning hen zeg Jan en wij kiekt oet oaver oe park. Doar mos ik natuurlijk mear van wetten. Een telefoontje noar `t bestuur en doar kwam `t an, Rinske en Sander hebt mien oet de dreum e holpen want eigenlijk had `t niks te maken met de bakkerieje of met mien familie wij hebt doarop beslotten um iets ludieks te doon veur `t park zodat de naam good gebroekt zal worden. Het wordt natuurlijk een prachtig park midden in Beltrum veur ieder den efkes boeten genieten wil . Kinder kunt der ravotten en de olders beweagen of nog older efkes lekker zitten op een benkske. Ze bunt der noe duftig met gengs en allemoale vriewillig heb ik vernommen. In de wieten heb ik al efkes e kekken en ik zag de olde wetholder Scharenborg ok met de schuppe in de hande . He mos zelfs zweiten zo fanatiek was e an `t scheppen. Ik denk loat ik hum moar niks zeggen dan geet e in ieder geval vedan. Mooi is dat wat de leu doar veur mekeare maakt een park veur `t hele darp. En toch ik kan het neet loaten, den naam steet mien wal biezonder good an.

Deel dit artikel:

Meer nieuws

Scroll naar boven