Fratsen Borstbeeld


NEEDE – Willem Sluiter joarenlang e woont in Eibargen moar `t blik dat dissen dominee en dichter in Neede is geboren. Dat kunt wij as Needenaren natuurlijk neet onbesprokken loaten en deurumme mos der een borstbeeld kommen van disse bijzondere man. In Eibargen hebt ze der al van alles oaver en dan noe ok in zien geboorteplaatse. Een prachtig beeld steet der noe te pronken bie de grote karke vlak noast zien oldershoes. Onze fantastische kunstenaar Anton te Braak hef der iets heel moois van e maakt. Noe was ik e vroagt um ok iets biezonders te doon um een betje reuring te maken met de onthulling. Ik dach loat ik eens met Anton de kunstenaar oaverleggen en zol ik zon beeld van chocolade noa kunnen maken??

Noe blik dat Anton van zien kunstwark ne malle mek en den dan oaverstrik met silicone. Silicone is `n soort van flexibel plastic en dat is ok heel geschikt veur chocolade. Dus wonder boaven wonder kwam der een verrassend mooi chocolade beeld oet. Anton is toch wal een echte kunstenaar as ik zee hoe he dat beeld hef e gotten ,doar bun ik dan mear een kunstemaker bie. Volgens mien bunt der in dee weareld ok mear kunstemakers as kunstenaars. Zo leep ik ne keare deur `t Kröller Müller museum en kwam ik in `n ruumte woar niks an de muure hing. De kamer was strak e varft in felle kleuren, in den hook van de kamer zat ne oppasser te loeren noar mien. Ik zeg tegen den kearl; zo sloapoele heb ie neet e zeene dat ze oe hier alle schilderrijen hebt vot e haalt ? Den man kik mien verschrikt an en zeg; hoe bedoel u? Ik zeg; noa der bunt hier allenig moar kale muren. Toen kreg ik oet e leg dat ik in `t midden van de ruumte mos goan stoan en de kleuren op mien in mos loaten warken en dan kreg ie een soort zen geveul oaver oe hen. Ik heb der `n hele tied e stoane en `t geveul kwam moar neet.

Ik zeg tegen de oppasser; volgens mien kun ie toch better `n paar spiekers in de muure sloan en doar wat schilderijen an hangen, woarop den besten man zeg: kom ie soms oet den achterhook? Joa zeg ik bowisse kun ie dat zeen? Nea zegge neet zeen want ik heb oe `n heele tied bekekken moar ik kon `t heuren. Jullie vonden het normaal wat Normaal deed en wij vinden `t normaal wat wij hier doen.

Deel dit artikel:

Meer nieuws

Scroll naar boven