Fratsen Tegenstriedigheden


NEEDE – Langzamerhand kump `t zowiet dat gin mense de wereld mear snapt. De hele wereld is `t deroaver ens dat wij wat zuuniger mot wean op de eardbol. Noe smiet ze mekeare doezend bommen en granaten noar de kop wat toch ne smearzooi brech, doar kun ie en ikke neet an vervuilen. Dat bedenk ik mien dan as ik heel fanatiek met de greune,grieze en oranje dekkel containers an `t scheiden bun. Het zweit lup mien van de kop,wat mot woar in?? Dan kiek ie soavonds `t journaal en zeet ie de troep van de oorlog, dat kan toch neet woar wean. Zit wij hier met zien allen te massen oaver `n stuksken karton of glas en doar vleegt oe van alles um de oarne hen. Met gezond verstand kun ie der neet bie. Boeren mot oet e koch worden of der met stoppen um stikstof of wat dan ok. De beeste krieg angepaste brokken zodat ze minder scheten loat. As ie mais pot bun ie een oetzichtbelemmerraar. De provincie wil noe ok `n ozb goan heffen um hun miljarden an te vullen veur allerlei onduudelijkheden. Op onze benzine zit belasting moar tank ie kerosine dan is dat belastingvrie. Ik geleuf toch dat ik goa kieken of ik argens een klein vleegtuugke op de kop kan tikken.

Wij sliept de vleugels derof en jenst dermet deur de stroaten, moar dat zal dan wal wear neet meugen. Langzamerhand loopt de dinge oet de hand Wil ie zelf oe hoes isolearen dan krieg ie gin subsidie moar as ie `t loat doon krieg ie wal subsidie, noadat ie alles betaald heb. Noe blik dat menigeen doar helaas `t geld neet veur hef um dat veur te scheten. Joa weurumme zul ie makkelijk doon as `t ook heel moeilijk kan. De subsidie zo bedenken dat `t hoaste unmeugelijk is dat ie `t kriegt. Een wieze road kreg ik ne keare bie de kamer van koophandel as ie oe ding kunt bereiken zonder subsidie heb ie een gezond bedrief. Dat is `n woarheid as ne koe den gin scheten mear lut.

 

Deel dit artikel:

Meer nieuws

Scroll naar boven