Fratsen Kleurt wal bie
Door Redactie op 02-07-2022
NEEDE – Noe was wij onlangs een betje an `t verbrekken ,hier en doar mossen wat tegels oet dee versletten waren. Ok een stukske muure mos vernieuwd worden en dan krieg ie altied `t gemas van; krieg ie de goeie kleure der wal bie. Het zal een ieder wal eens oaverkommen wean. Ie kunt dan ok zowat altied zeen dat der een stukske bie an e dretten is. Fiets moar eens rond op zundag en dan zeet ie van allerlei oetstulpsels dee neet kleurt bie de rest van `t hoes.
Zo heb wij al menig keare bouwvakkers e had en dee hebt doar dan een mooi verhaal bie. Zo kreg ik een pekske steene woarvan ik al zag dat ze vuls te rood waren. Ik zeg zo tegen den steenboer volgens mien is dat de goeie kleure neet, wat duch oe ?? Den man kik der efkes noa en zeg; nea bakker dat zee ie neet goed deur `t wear kleurt ze nog bie en oaver twee joar bunt ze precies zo as de olde steene. Wij bunt noe vief joar wieter moar dezelfde kleure is `t nog steeds neet. Toen kwam de voeger, he voegen alles keurig oet, moar vulle lechter as de olde voegen,en joa ik kreg `t zelfde antwoord: `t kleurt nog bie. Ok binnen den tegelzetter had het der oaver `t kleurt nog wal bie. Noe nam ik met den tegelzetter de proef op de som.
Ze waren met zien beiden dus ik zeg tegen den earsten den der smargens was; mien duch dat de voegen luk te lech bunt. Antwoord was; as `t der een tiedje inzit kleur `t altied wat donkerder noa. De tweede tegelzetter zeg ik; mien duch dat de voegen luk te donker bunt wat duch oe? Nea zeg nummer twee ie zult zeen dat noa een wekke of twee de kleure wat lechter zal wodden. Prachtig toch ik trap der iedere keare wear in net zoas iedereene volgens mien. Natuurlijk is `t zowat unmeugelijk um precies dezelfde kleure te kriegen en dat wet dee bouwvakkers natuurlijk ok precies. Noa twee wekke bunt ze vertrokken en dan goat wij neet mear zeggen; brek de boel der moar wear oet want de steene bunt neet good of de voegen bunt neet good. Noe dacht ik ik zal ze eens te pakken nemmen ik had gebak e maakt met pearse slagroom het zag der neet oet. Deskundig zetten ik ze `t gebak veur de neuze en ze kekken met een zoer gezichte noa `t gebakje. Ik zeg kiek dat is wat nieuws. Goh wat ne rare kleure zeg de tegelzetter kun ie dat wal etten? Ik zeg joazeker as ie hum op hebt en ie kiekt morgenvrog achter oe dan zul ie zeen dat de kleure wal bie etrokken is.
