Fratsen op kop


NEEDE – Op mien bienoa dagelijkse tochtje van Nee noar Beltrum zoog ik van de een op de andere dag inens allemoale vlaggen op kop hangen. Bie de earste dach ik nog dat `t ging um iemande den e slaagd was en met `n beschonken gezichte per ongeluk de NL vlagge op kop had e hangen. Goanderweg op beltrum an zag ik nog mear vlaggen opkop hangen, ik dach zol der een Nederlander in de gele trui fietsen in de tour de Frans?? Niks van dit alles het is protestearen nieuwe stijl. De boeren bunt unmundig van `t rit en wilt dat met iedereene delen.

Proaten en ouwehoeren oaver van alles en nog wat dat kunt de leu dee al die regels maakt, in `t beste pak of rok met de beene langoet onder toafel. Dee hebt soavonds de kleare nog net zo schoone as smargens. Moar dat loat boeren zich neet gebeuren. As ie een boer an zien vee en grond zit is hee in alle stoaten. Ik kan `t wetten want ik bun zelf groot e wodden op de boerderieje. Het stikstof probleem wet ik niks of en ik kan der ok neet good oet wies worden. Al dee eigenbeneumde deskundigen lolt wear lekker langs mekeare hen. Weurde as biodiversiteit waren der vrogger neet,ieder dee zien wark en was soavonds te meu um te kieken of der wal genog insecten of onkroed op `t land is. Ik denk dat het hele probleem ok veurtkump dat de verholdingen scheef begint te greuien. Der bunt noe tevulle leu dee neet mear smearig wordt en die goat de leu die wal smearig wordt vertellen wat ze vekeard doot.

Leu met zwil in de hande en vrouwleu met hoar op de tande zal verleden tied wean as de boeren der straks neet mear bunt. Zowiet zal `t toch neet kommen. De boeren holt `t noe nog redelijk netjes moar as ze nog arger in hun bestoan e raakt zult worden wet ik zeker dat ze noar Den Haag hen goat en doar de aaletonne lostrekt. Zol wat wean dat al dee gladproaters `n goeien schoer aale oaver zich hen zollen kriegen.

Deel dit artikel:

Meer nieuws

Scroll naar boven