Fratsen dagje oet


NEEDE – Ik was deur VIOS oet e neudigt um eens een keartje met te goan as sponsor van disse mooie vereniging noar FC Twente. Fantastisch natuurlijk want doar kom ie alle daage neet. Ie leart wear andere ondernemmers kennen op een leuke ontspannen maneare. Onder `t genot van een pot bier heb wij doar hearlijk zitten genieten in `t noajoars zunnneke. FC Twente won ok nog eens met dree nul van FC Groningen wat wil ie nog mear. Leas ik een dag later allerlei dinge in de krante woar ik niks van met e kreggen had. Der waren sprekkoren oaver homo`s e wes en noatied grote onlusten. Niks heb ik der van e zeene of e heurt. Dus of de krante zit dit gruwelijk op te bloazen of ik mot ne brille en een geheurapparaat hemmen. Heel apart is `t wal um dat hele gebeuren te bekieken veur een wedstrijd van anderhalf uur. Bienoa 30.000 leu komt doar op af. Ik as ondernemmer goa dan an `t prakkezearen natuurlijk. As al dee leu 1 breudje et of al dee leu 1 potje bier drinkt wat een geld geet der dan in umme.

Ik geleuf dat ik ok moar eens met de breudjeskoare doar op an mot. Noe zag ik doar ok nog toevallig `n olden leraar van schoole ik heb hum moar neet an e sprokken want wij laggen mekaere vrogger al neet zo bes. Den leraar had as hobby jagen dus he kwam ok geregeld bie ons thoes oaver de vloere. Ne keare wol he hen enden scheten en vroog of der nog jongelui waren dee met wollen. Zo zat he met enkele buurjongs an de kante van de bekke rare kwaak geluude te maken um de enden te lokken. Ondertussen begon he een verhaal te vertellen; as alle beume 1 groot`n boom zol wean wat zol dat toch een onwiezen boom wean, as alle auto`s 1 groot`n auto zol wean wat zol dat toch een onwiezen auto wean en he ging moar vedan, tot 1 van de jongs zei : as toch alle leraren 1 leraar zollen wean wat zol dat dan toch ne onwiezen kwast van ne kearl wean.

 

Deel dit artikel:

Meer nieuws

Scroll naar boven