NEEDE – Noe zul ie denken kolde rillingen in de zommer hearlijk toch. Ik zal oe vertellen wat mien ooit is oaverkommen in vrogger tied. Ok vrogger was het zommers wal eens
vernemsig heet. In disse tied begint iedereene dan te rearn van tropische temperaturen. Moar in mien jeugd was der nog gin internet en kreg wij lange alles neet met van `t nieuws. As ik noe smargens de krante online bekiek woag ik al hoste neet mear noar boeten hen. Der wurdt bie veurbaat al evenementen af e last umdat `t tropisch geet worden of dat der ne onwearsbuie ankump.
In het nieuws steet der dan ok volop wat ie doar tegen doon mot. Ieder joar komt dee verhalen wear. Blief oet de zunne, goa met de veute in een kold badje, leg oe ne natte lappe in de nekke, drink genog moar gin alchohol. Dus een hearlijk kold fris biertje dat kan neet terwijl dat hearlijk is met zon wear. Dat is ok wear zoiets van disse tied. Zogauw as het lekker is dan is het vake slech veur oe gestel. Der is altijd wal een deskundige te vinden den doar oetleg oaver kan geven. Moar um noe efkes op de kolde rillingen o m’n terug te kommen, ik was ne jonge van een joar of veartiene en met mien sproetenvel bleef ik altied zo wit as ne piere. Mien breur had het grus e meit in het kooibos ne weide tussen de beume met zowat gin wind. Ik mos het heui schudden en dach doar tussen de beume zal mien toch gin mense zeen. De bokse oet, het shirt oet en doar schudden ik hen midden in de brandende zunne. Ik dach nog; noe heur ik der straks ok bie met mien lekkere broene bast. Noa roem twee uur kwam ik thoes en de familie zoog het al, ik was zo rood as een vuurtoren. Knetter moar dan ok knetter verbrand. Noa een good uur begon de las kearl wat een narigheid. Mien mo stoppen mien in bad met ne melkbusse vol karnemelk.
Het verzachten de piene wal een betje moar toen ik noar berre ging had ik kolle rillingen van `t verbranden. Daags der noa kon ie de repen vel van mien of trekken verschrikkelijk. Sindsdien zul ie mien neet vake mear in de zunne zeen lopen. Dan proat der wat leu van lekker wear, noa Mien lekker wear is in de winter leefst bie min tiene. Dikken trui an en een vuurtje stokken boeten ik dreum der noa al van. Ik wens oe allen een hearlijke zommer en blief oet de zunne.
