Fratsen: stille op stroate
Door Redactie op 11-04-2020
NEEDE – Deur `t virus is `t apart stille op stroate. Ieder nemt de waarschuwen serieus en zo heurt dat ok. Het valt mien wal op dat der ok soavonds steeds minder leu met de hond an `t loop`nbunt. Noe kan `t wean dat ze de hond in den tuin loat geworden of hoof dee hunde toch neet zo vaake as anders. Denk moar eens an `t leedje: wie lut wie noe oet. Jammer is natuurlijk dat alle bevriedings dinge neet deur kunt goan. Een hoop leu bunt der drok met e wes en der was al van alles op touw e zet.
Oetgerekend dit joar zol e wie dat groots vieren umdat `t 75 joargeleden was. Noe was `t altied zo dat as ie vrogger iets neet wollen of neet lusten der deur de olde leu vaake e zeg werd; ie hadden de oorlog eens met motten maken. Oet gekkigheid heb ik dat ok wal eens e zeg tegen onze kinder. Noe bunt ze wal zo wies dat ze wet dat ik de oorlog ok neet met e maakt heb. Moar as ie al dee verhalen least, dan was der wal wat van an. Dat leuin de hongerwinter op fietsen zonder bende hierhen kwammen, um etten te zeuken. Kinder werden achter e loaten op de boer um an te starken. Vel oaver butte wazzen ze. Dan heb wij ondanks de corona toch nog weinig te massen. Etten en drinken is der veur ieder nog genog.
Dat gef toch wal een rustig geveul. Want gemas zol `t pas echt geven as ie neet mear genog te etten of drinken hebt. Misschien zegge wij later wal en onze kinder ok, as alles wear oet de weg is, ie hadden `t coronavirus eens met motten maken. Hoppelijkis de boel wear gauw onder controle en blief wij gezond. Wens ik oe fijne Poasdaage en hol oe kreggel.
