Doar bunt wie wear met de fratsen. Een nieuwe krante met `n betje olderwets geneul. De fratsen mot ie altied met `n korrel zalt nemmen. Der zit altied wal `n karn van woarheden in of `t had moar zo woar kunnen wean. De dinge die ik zoal met maak of um mien hen zee zal ik hier besprekken. Ie kunt `t der met ens wean of ie denkt ; tjonge jonge wat een gelal. Mek mien allemoale niks oet, moar ik hop dat ie geregeld `n lach op oe gezichte kriegt. Opvallend was disse wekke wal dat de burgemeister der hoogstwaarschienlijk 6 joar bie kreg. De gemeenteroad hef der al met in e stemt, noe mot he allenig nog hoppen dat het de koning zal behagen. Ons burgers, zeg moar het gewone klootjesvolk, wurdt veur `t gemak niks e vroagt. Zol koning Willem warkelijk noa kieken of Joost wal good zien beste dut ? Wat Joost zeker neet mot doon is; zingen. Met de carnaval hef he `n clip in e zongen en as ie de zaale vlot leug wilt hemmen loat ie de burgervader zingen. Misschien wurdt dat wal de strategie veur de kommende 6 joar. As Joost vundt dat de roadsvergaderingen te lange duurt, dat he dan begunt te zingen. Noe wet ik dat ze earder wal eens zeiden; zurg dat ie veur `t zingen de karke oetgoat. Tegenweurdig zit der veur `t zingen al bienoa gin mense in de karke. Misschien mot wij `t gezegde anpassen en der van maken, zurg dat ie veur `t zingen `t gemeentehoes oet bunt. Ik heur `t de bezurgde mooders al zeggen tegen de kinder, as ze zoaterdags hen stappen goat. Zurg dat ie veur `t zingen `t gemeentehoes oet bunt. Ik wis nooit ech wat `t te betekenen had ,moar toen der ne jonge oet de buurte mos trouwen, werd der heel smiesterig e zeg; den dol is te lange in de karke blieven zitten.
