NEEDE – Deur de ganse weareld hen bunt der protesten tegen racisme. Is natuurlijk op zich prima moar doo `t wal met verstand. Blief oet mekeare en doot neet zoas dee leu op de Dam want dat is vroagen um moeilijkheden. Ik sprak doaroaver ne bouwvakker den onlangs een bekeuring had e kreggen. He was der helemoale kloar met. He was met zien moat bezig e wes op de bouw um enkele stoepbandjes te leggen, dee mos ie samen met ne klemme beur`n um op de plek te leggen. Luk zwoar wark en dee bandjes bunt neet langer as ne meter, een Boa zoog dat en gaf ze de man `n bekeuring van 400 euro en veur de baas 4000 euro. Natuurlijk werd der duftig e mast oaver dat,dat neet anders kon moar betalen dat mossen ze en zeg den bouwvakker; soavonds rie ik met mien moat in `t busje wear op hoes an en dat mag dan wear wal. Knettergek bunt ze want as ie dee bandjes allenig leg dan mag dat wear neet van de arbeidsinspectie en derbie dee dinge bunt vuls te zwoar um alleenig te beuren. Zo moar een woargebeurd verhaal . De bouwvakker veulen zich zwoar benoadeeld ,want doar op de Dam hef gin mense `n bekeuring e kreggen. Dat is dan ok `t moeilijke an `t anderhalve meter verhaal `t is neet duudelijk . Zo vroag ik mien of hoe de jongeleu nog an `n partner wilt kommen en dat motten trouwen zal wal helemoale neet mear lukken. Noe bunt der natuurlijk altied kearls dee loopt te oaverdrieven moar anderhalven meter dat geleuf zelfs ikke neet.
