Fratsen klein maar fijn

NEEDE – Wie `t kleine neet eard, is `t grote neet weard. Dat is een oetdrukking den in disse tied wal heel toepasselijk is. Ie meugt thoes per dag moar dree man visite mear oetneudigen. Goat dan allemoale anderhalve meter oet mekeare zitten en ie hebt net zovulle lawaai as dat der  twintig man bunt. Lekker knuffelen of kussen is der ok neet bie. Doar zal neet ieder rouwig um wean. Ie hebt `t vast ok wal eens met e maakt dat `n eume of tante iets tekort an kwam um oe tegen zich an te drukken. Vaake kreg ie dan ok nog ne natten smakkert um de snoete hen of ne tante boag zich van achteren oaver oe hen en drukte de veurgevel dan krachtig tegen oe rugge an, met de weurde ; och wat bun ie toch `n bes kearltje.

Dat is dan noe gelukkig neet mear an de hand. Noadelen te oaver moar ok veurdelen genog. Het zal ok vas nog wal een tiedje duur`n veurdat der een ende an kump.De nieuwe maneare van proaten is dan de moderne maneare, via de computer of de telefoon. Wat dat angeet kun ie op afstand toch nog kort bie mekeare wean. Mooi was nog dat onze vrouwleu in de winkel een snoetkapje gingen dreagen, dus ok in Beltrum. Beltrum is natuurlijk een hearlijk dorp um in te wonen en wean, moar `t heurt wal gewoon bie Nederland. De earste beste klant den doar smargens kwam zoog dat de dames `n snoetkapje op hadden. Wat is dit dan noe wear, reep hè oet. De vrouwleu legden hum oet dat, dat `t advies was van de regering. Och,och zegt den klant moar toch neet hier in Beltrum.

Deel dit artikel:

Meer nieuws

Scroll naar boven