Fratsen online

NEEDE – Dit joar gin buutoavond of een betje wal. Dit joar gin Sinterkloas of toch een betje wal. Alle Prinsen en adjudanten blief een joartje langer an de macht want wij mot met zien allen bie mekeare oet de buurte blieven. Online neumt ze dat, geet alles gewoon vedan. Moar toch is dat minder. Ik wet dat ieder good zien beste dut um een ander te vermaken, moar toch niks zo gezellig as bie mekeare op `n hoop. Het zol toch helemoale wat wean as der gin online bestond. Dat ie net as vrogger alleenig moar een zwart wit televisie hadden, met Nederland 1 en 2 en as ie geluk hadden ok nog Duutsland 1 en 2. Hoe zol wij ons dan gedreagen hebben of misschien wal misdreagen.

Het nieuws mos dan van de radio of de krante kommen. Vrogger bie ons in de buurte had neet iedereene al vlot een televisie, as der dan wat biezonders op kwam gingen de leu noar mekeare hen um te kieken. In dee tied was der ok geregeld boksen op dat werd dan oet e zonden midden in de nacht. Een buurman van ons gaf doar nogal op of. De jongen bunt neet good wies um midden in de nacht te goan kieken noar `t boksen, as der snacht `n koo melk mot wodden kun ie ze der neet oet kriegen, woar mot dat toch hen. Daags noa `t boksen zeiden de buurjongs dat toen ze oet berre wazzen e kommen had Va al veur `t televisie e zetten. Ok bie ons thoes was `t altied `n gemas met de televisie. Afstandbediening bestond nog neet dus ie mossen `n knop indrukken um noar een anderen zender hen te goan. Al wattieds was den knop kapot en mos der `n luciferpinneke bie achter anders vloog e deroet. Ne keare verzat mien breur de zender twee keare achter mekeare, vanoet de achterkamer kwam de Va der an lopen met `n helligen kop, potdimme zeg he, blief toch eens met de peute van den knop of `t is verdomme gin typmachiene .

Deel dit artikel:

Meer nieuws

Scroll naar boven