Fratsen aparte dinge

NEEDE – In disse wondere aparte tied van beparkingen hebt wij ok allemoale iets mear tied um te leazen. As ie vulle least wurd ie vanzelf ok luk wiezer. Ie bunt dan een beleazen iemand. Zo leas ie dinge oaver het virus en kriegt doar een mening oaver. Der is al e zeg dat wij met 17 miljoen deskundigen bunt in vergeliek met `t Nederlands elftal. Ieder van ons hef wal wat te massen en gin mense is onfeilboar. Ok de regearing hef vremde kunsten in zich en loat wij de gemeente neet vergetten. Moar iets heel biezonders von ik toch wal dat leu dee in de gevangenis zit in quarantaine mossen en `t doar neet met ens wazzen. Noe heb ik nog nooit vaste e zetten, moar ik ging der van oet dat ie dan ok op eslotten zatten in oe cel. De dagen afturven op de muure,moar dat blik dus neet zo te warken.

Ik nem an dat degene dee doar zit neet veur niks zit en deur `t kwoad wat ie oet heb e vretten dan een tiedje achter slot en grendel goat of zoas `t ze mooi kunt zeggen op water en brood. Moar nea ok dee leu hebt rechten en wilt neet de hele dag in een hok zitten. Noe zakt mien de bokse neet gauw of moar dit is toch wal heel biezonder allemoale. Ok biezonder is oaveral oe excuses op maken. Sorry ik had dat neet motten doon denk hierbie aan Grapperhaus. Misschien een good item um te gebroeken veur degene dee vaste zit. Sorry `t was neet mien bedoeling um in te brekken. Sorry `t was neet de bedoeling um te hard te rieden.Of ie doot zoas den autorieder: de chauffeur van `n auto veel de politie op umdat he nogal slakkerde oaver de binnenweg. De politie heel hum an en rok meteen al `n alcholdamp. Zo zegt de agent dat is neet bes, ie wet dat ie neet mag drinken as ie riedt. Woarop den man zeg: joa ik wet `t ,ik wet `t moar ik had zovulle problemen in thoes dat ik efkes de zinnen mos verzetten. Woarop den agent zeg; moar alchol lost dee problemen toch neet op? Nea zegt de kearl, moar geitenmelk ok neet.

Deel dit artikel:

Meer nieuws

Scroll naar boven