Fratsen wetten en regels

NEEDE – Wetten en regels wurdt in disse tied sneller an e past as ooit te veuren. Veural degene die `t veur `t zeggen hebt past constant de regels en wetten an. Met name as ze zelf hebt oavertreden dan kan een wet binnen 24 uur veranderen um `t juridisch op orde te kriegen. Een mooi veurbeeld hierin is natuurlijk de zommer en wintertied,wat een geklooi um dat veur mekeare te kriegen en nog steeds doolt ze der oaver wieter. Urenlang betaald lallen oaver niks. Moar noe ston der een Engel op um de aovondklokke an te vechten. Wonder boven wonder krig he nog geliek ok. Dat had vast met zien naam te maken. Dissen Engel liekt mien noe neet bepaalt iemand den ie te serieus mot nemmen. Ie kunt oe afvroagen wat dut zo iemand veur de kost. Woar ok in `t land kan een demonstratie wean of Engel is der ok. Noe kunt engelen natuurlijk vleegen moar um dan steeds met de lippe veuran te goan stoan .

Ok `t kabinet is Engelgedrag neet vrumd. As `t te moeilijk wurdt begint dee ok zweverig te doon. Proaten,proaten,overleggen ,massen en mieren ,zelfs op zundag in `t Catshuus met de olde kleare an. In `t begin van de pandemie was iedereene trots op mekeare en noe vedan begint bie de meesten de hande te jukken. Ok hier in Berkelland is `t thoeswarken een onderschat probleem veural as ie doezend euro mag besteden um oe werkplek in te richten. Ok de scholen hebt `t moeilijk ,mochten ze endelijk los, lei der `n pak sneeuw van heb ik oe doar. Ne wekke later konden ze wear neet los umdat der enkele weerprofeten oaver code rood begonnen te schreeuwen en dan is `t veurjoarsvakantie wat dan wal deur geet. Wij kriegt met alle media vul te vulle informatie. Vrogger heb ik nooit met e maakt dat de schoole dichte ging um wat dan ok. Wij vertrokken een uurtje earder neet op de fietse, moar loopens. Mooi was altied wal, toen ik op de ambachtschoole zat , bie slecht wear de jongs dee `t wietste van schoole woonden `t earste op schoole wazzen en dee oet Borculo, kwammen of neet opdagen of vuls te laate.

Deel dit artikel:

Meer nieuws

Scroll naar boven