Fratsen Ter observatie

BERKELLAND – Ja leu ik heb `t ok al e kreggen, `t earste spuitje. Ik bun van 62 dus ik moch mienzelf anmelden. Wonder boaven wonder kon ik al noa dree dagen kommen. Ik mos der veur noar Borculo en doar zol ik `t Pfizer spuitje kriegen. Den naam al… Pfizer. As ie dat oetsprekt onder `t soep etten dan sprunk oe gebit oe zo oet de mond. Probear `t moar eens. Mooi is dan as ie doar bunt de leu te bekieken oftewal te observeren zoas ie dat deftig kunt neumen. Vulle proat zit der an gin mense .Moar der bunt der wat dee kiekt zo zoer dat `t moar good is dat ze een mondkepske op hebt. Wachten hoof ie der zowat neet en her en der stoat der leu dee oe van alles vroagt en dan mag ie wear een paar meter vedan lopen.

Ok de een bie de ander reageart anders op de prik, zal ok wal kommen met alle nieuws wat hieroaver e schreven wurdt. Mangs kun ie ok nog tevulle wetten want veural de dinge dee ie neet mot onthollen blieft oe altied deur de kop hen spoken.Zo had ik ok eens ne keare las van mien doem. Dan kun ie op internet via google intoetsen “las van den doem” en met een betje geluk krieg ie honderd antwoorden met de meest verschrikkelijke foto`s derbie. Een paar stukskes heb ik noa e leazen en mien las was al een stuk minder. Ik mos plotseling denken an een olde oetspraak; wat van eigens kump geet ok van eigens wear oaver. Dit geet natuurlijk neet oaveral bie op ,moar in `t geval van mien doem gelukkig wal.

Zo sprak ik ok en olde kundigheid bie `t prikken. Ik zeg zo dat is lange leene hoe geet `t dermet. Met een hoog stemmeke antwoord de bekende met; joa noe vedan geet `t wal wear. Ik zeg man wat heb ie `n hooge stemme e kreggen bun ie van `t fietspedaal af e schotten? Nea zeg was `t moar woar was `t antwoord. Ik mos veur een tiedje terugge noar `t zeekenhoes hen en had een breef e kreggen woar allemoale dure weurde in stonden ik kon der gin touw an vaste knuppen.Toen ze mien vroogen woar ik veur kwam zei ik dat`t iets met spatie te maken. De zuster zei o u komt voor de castratie?? Ik zegge joa dat geleuf ik wal. Toen ik later an `t biekommen was lag der ok een old mennenke noast mien. Ik zeg weurumme bun ie dan hier? Noa zegge e ik bun hier ter observatie en toen schot mien te binnen dat was `t woord woar ik neet op kon kommen.

Deel dit artikel:

Meer nieuws

Scroll naar boven