NEEDE – Wat veur de kleine winkeliers heel normaal is wurdt deur de supermarkten op e bloazen of ze iets nieuws hebt oet e vonden. Het preutje met de leu maakt de ambachtelijke bedrieven altijd al, dag in dag oet. En noe zut een supermarkt in dat, dat toch wal heef fijn is veur de leu. Stoat ze der artikel groot met in `t nieuws en legt oet hoe dat warkt. Ze hebt ne speciale kassa veur leu dee efkes andacht neudig hebt. Zo ken ik der nog wal een paar. Natuurlijk zegt ze oe leever helemoale niks en hopt dat ie oe koare zelf scant en met zovulle meugelijk noar boeten goat. Valt mien ok van de krante wal luk tegen dat dee der intrapt en ok schrieft asof der iets nieuws is oet e vonden. Grote kletskooke allemoale natuurlijk. Wat gin kletskooke is ,dat is `t Repair cafe in Beltrum. Op 30 oktober goat ze van start in de Wanne.
In disse wegsmiettied een prachtig idee dat ok de leu oet Beltrum kunt kommen um old gerei wear nieuw leaven in te bloazen. Dus kom moar op met oe striekiezers,stofzuugers,radio`s en bedenk `t moar. Een paar technische mensen probeart dan oe apparaat te maken zodat ie der wear joaren met vedan kunt. Zo kwam ik een kear bie `n old kearltje stoette brengen en he vroog mien ; zeg bakker heb ie ok verstand van de telavisie? Ik zeg; noa neet echt um earlijk te wean. Noa zeg e ik zet hum soavonds an op NL 1 en dan krieg ik hum neet mear op de andere zenders. Ik keek der efkes noa en hee deet `t prima. Het kearltje zeg wat een wonder. Ne wekke later `t zelfde wear bie hum deet `t neet en bie mien wal. Ik denk hoe kan dat toch en sprok met hum af dat ik soavonds efkes langs zol kommen. Doar zat `t kearltje wear noar NL1 te kieken en zei; bakker `t is wear zowiet. Wat blik noe he had de afstandsbediening verkeard umme vaste. Heb ik der met de stifte ne pijl op ezat en `t kearltje was dol gelukkig, deed de tv oet en zei; loat wij doar moar een borrel op drinken.
